Cefndir Gŵyl Fama

Mae Gŵyl Fama wedi datblygu o Ŵyl Cilcain a ddeilliodd o gyngerdd codi arian yng Nghapel Gad, Cilcain ar 17eg Hydref 1993 a drefnwyd gan y cerddor Peryn Clement Evans, yr actor nodedig Meredith Edwards ac aelodau'r capel.

Yn 2001 enillodd y bartneriaeth rhwng Gŵyl Cilcain a'i phrif noddwyr ar y pryd, Gwesty'r Beaufort Park, wobr genedlaethol, Arts and Business Cymru.

Yn 2007 ail-enwyd yr Ŵyl yn 'Gŵyl Fama' er mwyn adlewyrchu'r awydd i ymestyn y dalgylch ac annog rhai o drefi a phentrefi'r ardal i ymuno â'r gweithgareddau.

Bwriad Gŵyl Fama yw cyfoethogi bywydau pobl o bob sector o'r gymdeithas trwy gyflwyno cerddoriaeth fyw, y celfyddydau a diwylliant yr iaith Gymraeg mewn awyrgylch gyfeillgar

Lansiwyd yr enw newydd yn Eisteddfod 2007 Sir y Fflint a'r Cyffiniau. Yn Hydref 2007, 2008 a 2009 cynhaliwyd rhaglenni llwyddiannus o weithgareddau diwylliannol yn y trefi a phentrefi o gwmpas Moel Fama. Erbyn heddiw, trwy weledigaeth pwyllgor yr ŵyl a chefnogaeth pobl leol, mae Gŵyl Fama wedi datblygu i fod yn ddathliad byrlymus dros naw diwrnod.

Eleni ceir ystod eang o weithgareddau celfyddydol gan gynnwys, cyngherddau clasurol, pentref cerdd a chelf pobl ifanc, noson farddoniaeth ddwyieithog, taith ysgrifennu creadigol a chymanfa ganu. Cynhelir Gŵyl Fama eleni yng Nghilcain, Loggerheads, Hendre, Yr Wyddgrug, Llanferres, Pantymwyn, Yr Hôb a Fflint.

Ariennir yr Ŵyl trwy werthiant tocynnau, nawdd oddi wrth fusnesau lleol, rhoddion gan Ffrindiau'r Ŵyl a grantiau.

Os hoffech gefnogi'r Ŵyl fywiog hon, mae croeso i chi gysylltu â ni ar: Rhif Ffôn: 01352 754212 - E-bost: post@gwylfama.org.uk